The road to Madiba Cup

Batjha ba ka sebedisa bolo ho lwantsha bokebekwa. Phomolong ena ya mariha dihlopha tsa batjha ba lemo tse leshome le metso e mehlano di itokisetsa tlhodisano ya mohope wa Madiba o qalang bekeng ena. Mohope ona o hlophisitse e le karolo ya ho keteka letsatsi la Madiba la tswalo. Boitokisetsong bona, Young Strikers e ile ya amohela Bad Boys papading e neng e thabisa ebile e tlola ditlhase lebaleng la selehae J. B. Mafora. Papadi e qadile ka monyebe, empa sekgahla sa phahama ha Bad Boys e ne e hlaba ntlha ka Tshidiso Lefata ho tswa thahong ya huku. Mokgahlelong wa pele dihlopha ka bobedi di ne di laola bolo bohareng ba lebala. E ne e le metsotswana pele ho phomolo ha Young Strikers e lekanya dintlha ka Neo Phalatsane. Ntlha ya hae o e hlabile ka mokalangwane. Karolong ya bobedi Young Strikers, e ntseng e di hula pele lokong ya ba lemo tse leshome le metso e mehlano, e ne e lapetse ntlha, empa ya lebala ho kwala lebota le ka morao. Ke moo Tshidiso Lefata a ileng a bona monyetla o mong hape, mme a hlaba ntlha ya hae ya bobedi. Ho thatafatsa ditaba le ho feta sebapadi sa nomoro ya bosupa sa Bad Boys, Tidimalo Nake, se ile sa hlaba ntlha ya ho qetela ya papadi. Mokwetlisi wa Young Strikers, Gomolemo Masekoa o di behile tjena, “Ke kgetlo la pele re hlolwa ke Bad Boys. Ba ke ke ba o besa o tuke hape ha re ya mohopeng wa Madiba.” Ha e le wa mphato wa hae, Lehloonolo Majake yena o itse, “Tlholo ena empa e le monyetla feela, ke ne ke batla ho bona hore re re lokela ho lokisa hokae.” Ebang maemo a dumela, bobedi bona bo tla kopana ho makgaolakgang a mohope wa Madiba mafelong a tlang a beke, papading e ilo bapallwa lebaleng la Mangaung Outdoor Sports Centre.